سلام بعد غياب طويل عدنا
*******************
العرس عند الكفار و عندنا
*******************
الكفار لعنة الله عليهم و الله غير ناس ملاح فزواج ، يتعرف عليها يتاستي العقلية يزيد سمانا يروح يخطب يدي معاه بوكي تع ورد و بواطا شيكولا ماروخا
و ويروح غير مع يماه و باباه مايدي لا خوه لا وليد عمه معاه ، أيا يقصرو شويا و يلحقو لمسقي نهار السبت العرس في الكنيسة تع لافيل ،
نهار العرس العريس بكوستيم كلاسيك كرافاطا شويا ريحا ، العروسة روب بلانش ماكياج خفيييييف ركزلي على خفيف يجيبو زوج شهود صاحبه و صحبتها
و يجي هداك البابا تع الكنيسة يقوللهم هاديك تع هل تقبل وهل تقبلي ، نعم نعم ، من بعد جي هاديك اللقطة وين نحكمو التيليكوموند و نغيرو القنات وسط تسفيق الحضور
الذي لا يتجاوز عدده العشرين ، يعني مام ديرلهم شوا مرحش تخسر ، وتبدا حياتك معاها و سلام عليكم
.
.
.
أما في القارة الكحلاء وبضبط في هاديك لبلاد لي يسموها شكبستان ، محمود عشر سنين وهو يخرج مع سهام كي يلحق الصح يخطب صحبتها حنان ،
كي يروح يخطب يدي معاه بواطا باتيسري مع السخانا و السيركيلاصيو ولات قرنطيطا و يدي معاه خاوتو و خياتو بولادهم و ولاد عمومه و خواله و باباه ويماه
و جده و جدته لي نساو ما جابلهاش دواء تع لطانسيو كل زوج دقايق دوخ .
كي يطبطبو كي تحسبهم يلحقو واحد 46 بنادم ، يدخلو يجيبولهم القهوة يشربو و يشنفو و النساء يقطعو و ولاد عمومه يكحلو لعروسا
و الدراري صغار واحد هربلهم لشومبرا واحد بال تحته ، و العروسا كي تشوف لعريس زعما حشمانا و هوما نسكت خير ،
المهم نلحقو لصح يبدا التفاوض بين العريس و الأب هذا الأخير تقول راح يبيعلو مسعود أوزيل ، و العريس يتريتي ها ساعدنا عامي خلي الواحد يستبيت ،
على العموم صفقة حنان كلفت واحد 150 مليون بدون مصاريف الشحن و بعدها تم الإتفاق على إقامة العرس بعد 6 أشهر ....
ونهار العرس العريس كاره حياته لي يعرضه يجيب معاه 5 عباد الماكلا خلاصت بقاو 20 عبد مكلاوش عطالهم دراهم روحو كولو سوندويتش ،
و العريس دخل لصالا بش يتصدر مع مرته التي معقلهاش بعدما غيرت وجهها بزوج كيلو ورطل ماكياج يعني فلحالة هاديك مام يطبعولك يماها متفيقش ،
و العباد يقطعو ياه شوفيها نيفها شحال كبير هو خير منها وزيد القاطو يابس تقول صدقوهلهم ، و في النهاية كي جاو يباركو لعريس بدا يبكي بعدما شاف لعروسة
تقول لبنت عمها لعقوبة ليك .، ويا خاوتي بنت عمها شحال زلا يا ريت الزمان يولي للور
